வாஷிங்டன்: அமெரிக்காவைச் சேர்ந்த மூன்று பள்ளி நண்பர்கள், தாங்கள் தொடங்கிய ‘ஸ்டார்ட்அப்’ நிறுவனம் மூலம் மிக இளம் வயதிலேயே கோடீஸ்வரர்களாக உருவெடுத்து, ஃபேஸ்புக் நிறுவனர் மார்க் ஜூக்கர்பெர்க்கின் முந்தைய சாதனையை முறியடித்துள்ளனர்.
வரலாற்றுச் சாதனை: ஜூக்கர்பெர்க்கை முறியடித்த இளம் கோடீஸ்வரர்கள்
- கலிபோர்னியாவின் சான் ஜோஸ் நகரப் பள்ளியில் படித்த சூர்யா மிதா (22), ஆதர்ஷ் ஹைரேமத் (22) ஆகிய இரு இந்திய வம்சாவளி இளைஞர்களும், அவர்களது நண்பரான அமெரிக்காவைச் சேர்ந்த பிரென்டன் பூடி (22) என்பவரும் இணைந்து இந்தச் சாதனையைப் படைத்துள்ளனர்.
- இவர்கள் மூவரும் இணைந்து ‘மெர்கோர்’ (Mercor) என்ற செயற்கை நுண்ணறிவு (AI) சார்ந்த நிறுவனத்தைத் தொடங்கினர்.
- ஃபார்ச்சூன் இதழின் அறிக்கையின்படி, சான் பிரான்சிஸ்கோவைத் தலைமையிடமாகக் கொண்ட மெர்கோர் நிறுவனம் சமீபத்தில் 350 மில்லியன் டாலர் நிதி திரட்டியது. இதனால், நிறுவனத்தின் மொத்த மதிப்பு 10 பில்லியன் டாலர்களாக அதிகரித்துள்ளது.
புதிய மைல்கல்
- நிறுவனத்தின் தலைமை நிர்வாக அதிகாரி (CEO) பிரென்டன் பூடி, தலைமைத் தொழில்நுட்ப அதிகாரி (CTO) ஆதர்ஷ் ஹைரேமத், மற்றும் குழுத் தலைவர் சூர்யா மிதா ஆகிய மூவரும், சுய முயற்சியால் இளம் வயதிலேயே கோடீஸ்வரர்களானவர்கள் (Self-Made Billionaire) என்ற புதிய உலக சாதனையைப் படைத்துள்ளனர்.
- கடந்த 2008 ஆம் ஆண்டு, 23 வயதில் சுயதொழில் மூலம் கோடீஸ்வரரான பட்டியலில் முதலிடம் பிடித்து மார்க் ஜூக்கர்பெர்க் சாதனை செய்திருந்தார். தற்போது, 22 வயதே ஆன இந்த மூன்று நண்பர்களும் அவரது சாதனையைப் பின்னுக்குத் தள்ளி, உலக அரங்கில் கவனத்தை ஈர்த்துள்ளனர்.
